Müəllifə aid 171 aforizm var:

Elmlə, ədəblə tapılar şərəf, Mirvari olmasa, nə lazım sədəf.

Xüdpəsənd olmayan təmiz bir insan,
Qorxmaz nə yaxşıdan, nə də yamandan.

Əgər insansansa insanlığı sev.

Aqillər kam alır yaxşılıqlardan.

Yaxşılıqla pisdən qorunmaq mümkün,
Dünyada yaxşılıq hər şeyə üstün.

Bir kəsin dadına istəsən çatmaq,
O zaman ləngimə, tələs sən ancaq.

Yaxşılıq etməsən əgər insana,
Böyüklük şərəfi verilməz sana.

Bəlli bir şeydir ki, pislik edənlər
Öz işindən özü çəkəcək zərər.
Eşitməmisənmi bu məşhur sözü:
“Quyu qazan adam düşəcək özü”.

Öz qəbiləsinə asi olan şəxs
Onunla bir yerdə yaşaya bilməz.

Qan ilə islanmış zülmkar başdan,
Şübhə yox, yaxşıdır başsız bir insan.

Dünyanı namusla olur saxlamaq,
Onunla ucalır dövlət və bayraq.

Zülmü birdəfəlik eylə sən kənar,
Çünki zülmkarlıq ömrü azaldar.

Həyasız adama qarşı sərt rəftar
Yumşaq davranmaqdan faydalı olar.

Qardaşın qanını alma qardaşdan,
Tamam ayrı şeydir çünki südlə qan.

Qarşına canavar çıxdığı zaman
Ya öldür, ya da tut, heç vermə aman.

Xəcalət çəkəni etməzlər zəlil,
Bu zülmkarlıqdır, ədalət deyil.

Uğurlu şey deyil zülm elyləmək, bil.

Zülmün toxumundan göyərməz nəbat.

Hansı bir ölkədə alışsa çıraq
Hər bir qanacaqlı verər ona yağ.

Dünyada zülm etmək qoçaqlıq deyil,
Rəiyyət bəsləmək çox yaxşıdır, bil.

Kim ki, zülmün evini bərbad edib indidən,
Öz sabahkı evini abad edib indidən.

Məmləkətin dayağı ədalətdir hər zaman,
Ədalətin nəsibi səadətdir hər zaman.

Məsləhətə möhtacdır ədalət hər bir zaman.

Düşmənlik silinsin, dostluq var olsun.

Madam ki, sülh ilə göyərər dilək,
Döyüşə at çapmaq daha nə gərək?